Қосылу шарты (Сауда-саттық платформасының офертасы)
Осы Қосылу шарты (Сауда-саттық платформасының офертасы), бұдан әрі «Шарт» немесе «осы Шарт» деп аталумен, бұдан әрі «Сауда-саттық платформасы» деп аталатын «Jusan Mart» жауапкершілігі шектеулі серіктестігі мен Шартқа Шартпен көзделген тәртіп пен шарттармен қосылған Сатып алушылар мен Сатушылардың арасында бұдан әрі бірге «Тараптар» деп, ал жеке-жеке «Тарап» деп немесе жоғарыда көрсетілгендей аталумен, Тараптардың Сайтты пайдалану мәселелері бойынша өзара іс-қимыл шарттары мен тәртібін белгілеу, сондай-ақ Сатып алушылардың Тауарларды Сайтта Тапсырыс беру арқылы сатып алуы кезінде Тараптардың жауапкершілік аймағын белгілеу мақсатында жасалған.
1.   Терминдер мен анықтамалар
Осы Шартта төмендегідей ұғымдар (терминдер, анықтамалар) қолданылады:
•   Банк – «First Heartland Jusan Bank» акционерлік қоғамы.
•   Биометриялық сәйкестендіру – Сатып алушыны Биометриялық деректерге негізделе отырып сәйкестендіретін шаралар кешені;
•   Биометриялық деректер – субъектінің жеке басын өздеріне негізделе отырып анықтауға болатын дербес деректер, олар дербес деректер субъектісінің физиологиялық және биологиялық ерекшеліктерін сипаттайды;
•   Банкілік қарыз шарты – Банк пен Сатып алушының өзара жасасатын шарты, оған сәйкес Банк Сатып алушыға Тауар сатып алуға арнап төлену, мерзімділік және қайтарылу шартымен Қарыз ақша ұсынады.
•   Қарыз – Банкінің Сатып алушыға Сатып алушының Сатушыдан Сайт арқылы Тауар сатып алуына арнап Қазақстан Республикасының ұлттық ақшасымен Банкілік қарыз шарты бойынша төлену, мерзімділік және қайтарылу шартымен ұсынатын ақшасы.
•   Тапсырыс – Сатып алушының Сатушыға арналған Интернет-дүкенде немесе Банкінің ұялы қосымшасында, сонымен бірге төлем құралдарын қолданумен ресімдеген Тауарды немесе Тауарлар тізімін сатып алу туралы сұратуы.
•   Интернет-дүкен/Сайт – Сауда-саттық платформасына тиесілі болып табылатын www.jmart.kz, www.jusan.kz/shop, адресі бойынша орналасқан Интернет-сайт, сондай-ақ Банктің ұялы қосымшасындағы Jusan Дүкен.
•   Несиелік лимит – Сатып алушыға тауарларды/көрсетілетін қызметтерді олардың ақысын бөліп төлеумен сатып алу үшін Несиелік карта өнімінің шеңберінде ұсынылуы мүмкін қарыздық қаражаттың шекті сомасы.
•   Тауарларды/көрсетілетін қызметтерді олардың ақысын бөліп төлеумен сатып алуға арналған Несиелік карта – Сатып алушыға Банкінің Банк пен Сатып алушының өзара жасасқан Шартының шарттары бойынша ұсынған Қарыз ақшасының есебінен және Сатып алушының меншікті қаражатының есебінен заттарды олардың ақысын бөліп төлеумен сатып алуға, төлемдерді және (немесе) аударымдарды жүзеге асыруға мүмкіндік беретін төлемдік карта.
•   Жеке тұлғаға банкілік қызмет көрсету туралы кешенді шарт – Банк пен Сатып алушының өзара жасасатын, өзінде Банкінің Қазақстан Республикасының заңнамасына және Банкінің ішкі құжаттарына сәйкес жеке тұлғаларға қызмет көрсету және өнімдерді ұсынуының стандарттық шарттары айқындалған, сондай-ақ Сатып алушы мен Банкінің құқықтары мен міндеттерін белгілейтін, сондай-ақ Банк пен Сатып алушының арасындағы құқықтық қатынастардың өзге де ерекшеліктерін белгілейтін Шарт.
•   Сатушының офертасы – Сатушының өзі сататын Тауарларды сатудың, жеткізудің және қайтарудың шарттары туралы мәліметтер, сондай-ақ Тауарды сату-сатып алу мәмілесін жасасу және орындау үшін елеулі болып табылатын өзге түрдегі ақпарат қамтылған ұсынысы. Сатушының офертасы Интернет-дүкеннің Тауардың сипаттамасы берілген бетте орналасқан сілтеме бойынша қолжетімді немесе оны Сатушы Сатып алушының назарына Тауарды сату-сатып алу мәмілесі жасалмай тұрып жеткізуі тиіс.
•   Сатып алушы – Сатушыдан Тауарды Сауда-саттық платформасының аспаптарын қолданумен және Тапсырыс берумен сатып алуды көздеп отырған жеке тұлға.
•   Сатушы – Тауарды Тапсырыстар арқылы сатып отырған заңды тұлға немесе жеке кәсіпкер.
•   Тауар – Сатушымен сатуға арнап ұсынылған тауарлар, жұмыстар, көрсетілетін қызметтер.
•   Сауда-саттық платформасы – «Jusan Mart» жауапкершілігі шектеулі серіктестігі («JMart» ЖШС), ол Сатушылар мен Сатып алушылардың өзара байланыс орнатуы және мәміле жасасуы үшін Интернет желісі арқылы бағдарламалық-техникалық мүмкіндіктерді ұсыну қызметтерін көрсетеді (сауда алаңшасын, атап айтқанда: Интернет-дүкенде/Интернетте нақты уақыт режимінде жұмыс істейтін Сайтты ұсыну), сондай-ақ Банкінің несиелік өнімдері туралы ақпаратты жайғастырады.
•   QR-код – серіктесті визуалды машинамен оқылатын штрих-кодтарды қолданумен сәйкестендіруге, сол арқылы тауардың/көрсетілген қызметтің төлемақысының жүзеге асырылуын қамтамасыз етуге мүмкіндік беретін технология.
•   Шарттағы терминдер мен анықтаулар бас әріппен, сондай-ақ кіші әріппен, кез келген текте және септікте берілуі мүмкін.
2.   Шартқа қосылу тәртібі
2.1.   Осы Шарт Қазақстан Республикасы Азаматтық кодексінің 389-бабының ережелеріне сәйкес жасалатын қосылу шарты болып табылады, оның шарттарын Сатушы мен Сатып алушы жалпы алғанда осы Шартта көрсетілген және осы Шарттың шарттарын толық көлемде акцептілеу деп бағаланатын іс-қимылдарды жүзеге асырумен, осы Шартқа қосылу арқылы ғана қабылдай алады.
2.2.   Сатушы осы Шартқа Сауда-саттық платформасымен қызмет көрсету шартын жасасу арқылы қосылады.
2.3.   Сатып алушы осы Шартқа келесі түрде қосылады:
1) егер Тауардың ақысы Сатып алушының меншікті қаражатының есебінен төленіп отырса, Сайтта Тапсырыс беру арқылы қосылады.
2) егер Тауардың ақысы QR коды арқылы төленіп отырған болса, нақты төлем жүргізілген сәтте;
3) Сатып алушы осы Шартқа, егер ол Тауарды несиеге немесе бөліп төлеумен алып отырған болса, «Jusan QR» және одан әрі «Несие» «Бөліп төлеу» нұсқасын таңдау арқылы автоматты түрде қосылады.
2.4.   Сатушы мен Сатып алушының олардың осы Шартқа қосылғанын растайтын іс-қимылдарды орындауы төмендегі жағдайларды куәландырады:
2.4.1.   Шартқа қосылған тұлға Шарттың шарттарын қандай да бір ескертусіз және қарсылықсыз толық көлемде оқып, түсініп және қабылдады;
2.4.2.   Шартта оған қосылған тұлға үшін оның өзінің қисынды қызығушылығына негізделумен қабылдамайтын, ол үшін қандай да бір ауыртпалықты тудыратын шарттар жоқ;
2.4.3.   Шартқа қосылған тұлғалардың, егер мұндай тұлға осы Шарттың 2.2., 2.3 тармақтарында көзделген іс-қимылдарды жасаған болса, олардың Шартты оқымауының/түсінбеуінің/қабылдамауының дәлелі ретінде Шартта қолтаңбасының болмауына сілтеме жасап отыруға құқы жоқ;
2.4.4.   Шарттың барлық ережелері Шартқа қосылған тұлғаның мүддесі мен еркіне толықтай сай келеді;
2.4.5.   Шартты жасасу және оның шарттарын орындау Шартқа қосылған тұлғаның құрылтай және өзге құжаттарын және/немесе Қазақстан Республикасы заңнамасының және/немесе Шартқа қосылған тұлғаға қатысты қолдануға жататын заңнаманың кез келген ережесін бұзбайды және оның бұзылуына әкеп соқтырмайды.
2.5.   Шартқа қосылған тұлға Шарттың қандай да бір ережелерімен келіспеген жағдайда мұндай тұлғаның Сайтты пайдалануға құқы болмайды. Егер Сауда-саттық платформасымен Шартқа онымен көзделген тәртіппен қандай да бір өзгертулер енгізіліп және Шартқа қосылған тұлға олармен келіспей отырған болса, мұндай тұлға Сайтты пайдалануды тоқтатуға міндетті.
3.   Шарттың тақырыбы
3.1.   Сауда-саттық платформасы Сайттың Сатушылар мен Сатып алушылардың өзара байланыс орнату және өзара мәмілелер жасасу мүмкіндігін, соның ішінде Сатушылардың Тауарлар туралы ақпаратты жайғастыруы, Сатып алушылардың Тауарларды сатып алуға Тапсырыс беруі арқылы жүзеге асыру мақсатында жұмыс істеуін қамтамасыз етеді.
3.2.   Сатып алушы Тапсырыс берумен және Тауардың ақысын төлеумен Сатып алушының банкілік шотынан төлемді қабылдау және қаражатты Сатушының банкілік шотына аудару рәсімін Банктің жүзеге асыратынымен (есеп айырысуларға қатысушылардың ақпараттық-технологиялық өзара іс-қимылын қамтамасыз ету қызметтерін ұсынумен) келіседі. Сатып алушының Сайттағы Тауардың ақысының төленуіне келісім беруін растайтын іс-қимылдар Банкіге Сатып алушының банкілік шотындағы ақшаны қабылдау және оны ақысы төленіп отырған Тауарды Сатушының банкілік шотына аудару рәсімдерін орындауды тапсыру деп бағаланады. Сайттан сатып алынған Тауардың ақысын төлеу тапсырмасы Интернет-дүкеннен Тапсырыс берген күннен бастап 3 (үш) күнтізбелік күн бойы күшінде болады.
3.3.   Тауардың ақысы Банктің Сатып алушыға Қарыз ақша беру және онымен Банкілік қарыз шартын жасасу туралы шешім қабылдаған жағдайда Қарызға берілген ақшаның есебінен төленуі мүмкін. Сатып алушы мен Банкінің арасындағы Қарыз ақшаны берумен және қайтарумен байланысты қарым-қатынастар Банкілік қарыз шартымен реттеледі. Банкілік қарыз шарты Сатып алушының Банктің ұсынған сервисі арқылы онлайн түрде қажетті құжаттар жиынын ұсынғаннан кейін жасалады.
3.4.   Сатып алушы Тауардың ақысын Несиелік лимит қаражатының есебінен төлей алады. Сатып алушы мен Банкінің Несиелік лимит бойынша төлем жүргізу тәртібімен байланысты қарым-қатынастары жеке тұлғаға банкілік қызмет көрсету жөніндегі Кешенді шартпен реттеледі, ол Сатып алушымен Банктің ұсынған сервисі арқылы онлайн түрде қажетті құжаттар жиынын ұсынғаннан кейін жасалады.
3.5.   Сатушы Сатып алушы Тапсырыс берген жағдайда Тауарды сату-сатып алу мәмілесін жасасуды растау бойынша іс-қимылдарды жүзеге асырады, сондай-ақ осындай мәмілені тиісті түрде орындау үшін барлық қажетті іс-қимылдарды орындайды.
4.   Тараптардың жауапкершілік аймағы
4.1.   Сауда-саттық платформасы Сатушы Офертасының мазмұны үшін, Тауардың сапасы үшін және Тапсырыстың жиынтығы үшін жауапкершілікте болмайды. Сауда-саттық платформасы Сатушының ұсынған деректеріне сәйкес Интернет-дүкенде жайғастырылған Тауардың суреттемесі үшін, Тауардың бағасы мен оның сипаттамалары үшін жауапкершілікте болмайды. Аталған жағдайлардың барлығында жауапкершілік толығымен Сатушыға жүктеледі. Сайтта жайғастырылған тауар белгілері тек қана ақпараттық мақсатта пайдаланылады.
4.2.   Сайтта, оның кез келген бөлімдерінде жайғастырылған барлық мәліметтер мен деректер, сонымен бірге Тауардың бағалары, сипаттамалары, Тауарлардың бар-жоғы туралы ақпарат, Сатушылардан Тауарларды таңдап алу және сатып алу, Қарыз шартын ресімдеу туралы ақпарат ақпараттық нысанға ие және Сауда-саттық платформасымен жайғастырылған жария оферта болып табылмайды. Сауда-саттық платформасымен жіберілген кез келген хабарламалар, сонымен бірге Сайтты қолданумен жіберілген хабарламалар қандай да бір мәмілелерді жасасу үшін оферта/акцепт/негіздеме немесе Сауда-саттық платформасы мен қандай да бір тұлғаның өзара мәміле жасасқанын растайтын факт болып табылмайды. Сауда-саттық платформасы Сайтта ең дұрыс және өзекті ақпараттың жайғастырылуын қамтамасыз етуге тырысады, дегенмен де ол Сатып алушылардың және/немесе Сатушылардың Сайтта берілген ақпаратқа ғана сүйенумен қабылдаған шешімдерінің нәтижесінде туындаған залалдар, нұқсан немесе шығындар үшін жауапкершілікте болмайды.
Сауда-саттық платформасы себебін көрсетусіз Тапсырысты ресімдеуден бас тартуға құқылы.
4.3.   Сауда-саттық платформасы ұсынылатын қызметтер туралы деректерді, сайтта берілген кез келген ақпаратты, сондай-ақ осы Шартты алдын-ала ескертусіз өз ұйғарымы бойынша кез келген уақытта өзгертіп отыруға құқылы.
4.4.   Тауар Сатушының және/немесе Сатып алушының таңдауына қарай келесі әдістердің бірімен жеткізіледі:
4.4.1.   Сатып алушының Тауарды өзі келіп алып кетуі;
4.4.2.   Сатушының күшімен және қаражатымен;
4.4.3.   Сауда-саттық платформасында жайғастырылған және жеткізу қызметтерін ұсынатын басқа Сатушымен.
Тапсырысты мұндай әдіспен алған жағдайда Сатып алушы көрсеткен ұялы нөмірге код жіберіледі. Сатып алушы Тапсырысты алғанын растау үшін аталған кодты жеткізу әдісіне байланысты курьерлік қызметке немесе Сатушыға хабарлауға міндетті. Сатып алушы кодты хабарлаумен курьерлік қызметтен немесе Сатушыдан Тапсырысты алғанын растайды. Курьерлік қызмет немесе Сатушы Сатып алушыдан алған кодты енгізгеннен кейін Тапсырыс Сатып алушыға жеткізілген/тапсырылған деп саналады. Сатып алушыда код болмаған жағдайда немесе егер Сатып алушы өзге себептермен оны хабарлаудан бас тартып отырған болса, Тауар Сатып алушыға тапсырылмайды. Сатып алушының QR-кодты қолданумен ақысын төлеген тапсырысты Сатып алушы өзі келіп алып кетеді. Бұл жағдайда Тауарды тапсыру үшін код қажет емес. Сатып алушы Тапсырысты Тауардың ақысын QR-код арқылы төлеген сәттен бастап алған деп саналады.
Жеткізу қызметтерінің ақысын Сатып алушы жеткізу қызметтерін ұсынушылардың тарифтеріне сәйкес төлейді.
4.5.   Сатушы мен Сатып алушының арасындағы жеткізу қызметіне кез келген ілеспе қызметтерді (сонымен бірге, алайда өздерімен шектелмейтін: жиынтықтау, орнату, іске қосу-теңшеу, техникалық, сервистік және кепілдік қызмет көрсету), Тауарларды айырбастау, Тауарларды қайтару қызметтерін ұсыну жөніндегі қарым-қатынастарды Сатушы мен Сатып алушы өзара реттейді. Сауда-саттық платформасы Сатушының осы тармақта көрсетілген Сатып алушының және/немесе үшінші тұлғалардың алдындағы міндеттемелерін орындамағаны үшін және/немесе тиісті түрде орындамағаны үшін жауапкершілікте болмайды.
4.6.   Сауда-саттық платформасы Сатушы сатып отырған Тауардың сапасы үшін, Тауарды жеткізу, орнату, іске қосу-теңшеу үшін жауапкершілікте болмайды. Сатушы Сатып алушылармен Тауардың сапасына, санына және жиынтығына қатысты, сондай-ақ Сатушының Тауарды тиісті түрде сатумен байланысты және осындай сатуға ілеспе қызметтермен байланысты кез келген шағымдар мен дауларды шешу үшін барлық мүмкін болар шараларды өз бетінше қабылдап отыруы тиіс.
4.7.   Сатып алушы өзінде Тауардың ақысын төлеу үшін ақшалай қаражаттың жеткілікті болуы үшін және/немесе Сатып алушының Банкімен арада жасасқан Банкілік қарыз шарты және/немесе Жеке тұлғаға банкілік қызмет көрсету жөніндегі кешенді Шарт бойынша міндеттемелерді орындауы үшін өзі жауапкершілікте болады. Сауда-саттық платформасы Сатып алушыда Тауардың ақысын төлеу үшін және/немесе Қарыз және/немесе Несиелік лимит бойынша берешекті өтеу үшін қаражаттың жетіспеушілігі жағдайлары үшін жауапкершілікте болмайды.
4.8.   Сатып алушының Сайтта тіркелген кезде ұсынатын ақпаратының дәлдігі мен дұрыстығы үшін Сатып алушы жауапты. Сатып алушы Тапсырыс берген кезде Тапсырысты алушының жеке басына және Сатып алушымен немесе Тапсырыстың өзге алушысымен байланысу әдістеріне қатысты дұрыс деректерді ұсынуы тиіс. Сатып алушы ол деректерді дұрыс көрсетпеген жағдайда ол барлық тәуекелдерді, сонымен бірге Тапсырыстың орындалмау немесе тиісті түрде орындалмау тәуекелін өзі арқалайды.
4.9.   Сауда-саттық платформасы Сайттың тиісті түрде жұмыс істеуін қамтамасыз етеді, техникалық істен шығулар мен үзілістер кезіндегі оның жұмыс қабілетін жедел түрде қалпына келтіреді. Алайда Сауда-саттық платформасы Сайттың үздіксіз жұмысына және Сайттың жұмысында үзілістер болған жағдайда оның жұмыс қабілетін қалпына келтірудің қайсыбір мерзімін ұстануға қатысты кепілдік бермейді. Сауда-саттық платформасы Сайттың Сатып алушылардың талаптары мен үміттенулеріне сәйкес болып отырғанына/сәйкес, сондай-ақ Сайттың функционалы үздіксіз, сенімді және қатесіз ұсынылатынына кепілдік бермейді. Сауда-саттық платформасы Сатып алушыға сапалы қызмет көрсетуді қамтамасыз ету мақсатында, сонымен бірге Сайттың жұмысында техникалық үзілістер болған кезде қажетті шаралар қабылдайды. Жүйеде туындаған барлық техникалық бұзылулар мен қателер туралы info@jmart.kz Сайтты қолдау қызметінің электронды мекенжайы бойынша хабарлануы тиіс.
4.10.   Сауда-саттық платформасы телекоммуникациялық және энергетикалық желілердің бұзылуының, зиянкес бағдарламалардың әрекетінің, сондай-ақ үшінші тұлғалардың Сауда-саттық платформасына рұқсат етілмеген түрде қатынауға және/немесе Сауда-саттық платформасының бағдарламалық және/немесе аппараттық кешенін істен шығаруға бағытталған арам іс-қимылдарының салдарынан өз міндеттерін орындамағаны немесе тиісті түрде орындамағаны үшін жауапкершілікте болмайды. Сауда-саттық платформасы Сатып алушының Сайтты немесе оның жеке функционалын пайдаланудың салдарынан туындаған оның кез келген түрдегң залалдары үшін жауапкершілікте болмайды.
4.11.   Тараптар Шарт бойынша міндеттерін орындамағаны немесе тиісті түрде орындамағаны үшін көзделген жауапкершіліктен мұндай жағдай Шарттың күшінде болу кезінде өздерін Тарап не алдын-ала болжап, не қисынды шаралармен алдын ала алмаған төтенше сипаттағы оқиғалардың (форс-мажор) нәтижесінде туындаған еңсерілмейтін күш жағдайларының салдары болып отырған болса, босатылады.
4.11.1.   Форс-мажорлық жағдайлардың басталуы мен тоқтатылғаны туралы өз міндеттерін аталған жағдайларға байланысты орындамай отырған Тарап форс-мажорлық жағдайлар Тараптарға олардың басталғаны және орын алып отырғаны жайлы бұқаралық ақпарат көздерінде кеңінен хабарлануына байланысты мәлім болған жағдайларды санамағанда, өзге Тараптарды осындай жағдайлардың басталуы мен тоқтатылғаны туралы 7 (жеті) жұмыс күні ішінде жазбаша түрде хабардар етуге міндетті. Тараптардың бірінен мұндай хабарламаны алған Сауда-саттық платформасы қажет болған жағдайда өзге Тараптарды ақпарат беру арқылы хабардар етеді.
4.11.2.   Форс-мажорлық жағдайлардың орын алуы мен жалғасып отыруының дәлелі ретінде Қазақстан Республикасының құзырлы органдарымен беріліп отырған құжаттар болып отыруы мүмкін.
4.11.3.   Осы Шарттың 4.11 тармағында көрсетілген жағдайларға сілтеме жасап отырған және осы Шарттың 4.11 тармағымен көзделген өзге Тарапты хабардар ету туралы міндеттемені орындамаған Тараптың осы Шарт бойынша өз міндеттерін орындамаған, толық немесе тиісті түрде орындамаған жағдайда аталған жағдайларға сілтеме жасап отыруға құқы жоқ.
4.11.4.   Осы Шарттың 4.11 тармағында көрсетілген жағдайлардың күші жойылғаннан кейін Тараптар Шарт бойынша өз міндеттерін орындауды жалғастыра беруге міндетті.
4.11.5.   Сатып алушы және/немесе Сатушы Сайтты пайдалану кезінде, Сайтты пайдаланудың нәтижесінде жасасқан Тауар(лар)ды сату-сатып алу мәмілесін (мәмілелерін) орындау, осы Шартты орындау барысында қандай да бір алаяқтық операцияларды және/немесе алаяқтық сипаттағы іс-қимылдардың жасалуына жол берген жағдайда Сатып алушы және/немесе Сатушы Сауда-саттық платформасы нұсқаған мерзім ішінде Сауда-саттық платформасына Шарттың осы тармағымен көзделген операцияларымен/іс-қимылдарымен келтірілген зиянды өтейді.
4.11.6.   Сатушы оның осы Шарт бойынша міндеттерін орындауы кімде-кімнің зияткерлік меншік құқықтарын қорғау саласындағы құқығы мен заңды мүддесін бұзбайтынын мәлімдеп және оған кепілдік береді. Сатушы сондай-ақ Тауарларды сатуға, Сауда-саттық платформасына өздері бойынша Тауарлар Сайтта ұсынылатын тауар белгілері мен атауларын пайдалану құқығын ұсынуға, сондай-ақ Тауарларды Сайтта тиісті тауар белгілерімен және атауларымен ұсынуға қатысты барлық қажетті рұқсаттары мен уәкілеттігі бар екенін мәлімдеп және оған кепілдік береді. Сатушы Сатушы мен Тауарларды шығарушылардың, тауар белгілерінің және өзге түрдегі зияткерлік меншік нысандарының құқықтық иеленушілерінің арасындағы қатынастарда туындауы мүмкін шағымдар, шағымталаптар, соттық тергеулер бойынша жауапкершілікті өзі (Сауда-саттық платформасын қатыстырусыз) арқалайды.

5.   Тауарды қайтару
5.1.   Тауарлар Қазақстан Республикасының заңнамасымен көзделген жағдайларда қайтарылуы тиіс.
5.2.   Тауар қайтарылған жағдайда Сатып алушы Тауардың Сатушысына жүгінеді. Егер Сатып алушы Қарыз немесе Несиелік лимит қаражатының есебінен сатып алынған Тауарды қайтарып отырған болса, Банкілік қарыз шартын немесе Жеке тұлғаға банкілік қызмет көрсету жөніндегі кешенді Шартты жасасуға, орындауға, бұзуға және оны тоқтатуға бағытталған іс-қимылдар үшін жауапкершілікті Сатып алушы арқалайды.

6.   Дербес деректер
6.1.   Сатып алушы осы Шартқа қосылу фактісінің Сауда-саттық платформасына Сатып алушының дербес және Биометриялық деректерін төменде көрсетілген шараларға байланысты мақсаттармен жинауға, сақтауға, өңдеуге, пайдалануға және Сатушыға және/немесе Банкіге және/немесе өзге үшінші тұлғаларға беруге, сондай-ақ Сайт модульдерінің арасында кез келген әдіспен, сонымен бірге байланыс қызметтерін (пошталық, телефондық, Интернет-байланыс, ұялы және басқа байланыс түрлерін) ұсынатын тұлғалар арқылы трансшекаралық таратуға келісім беру деген мағынаны білдіретінімен келіседі және оны растайды:
6.1.1.   Интернет-дүкенінің аспаптарын қолданумен Тапсырыс берумен және/немесе Тауарды сатып алумен, сонымен бірге Сатып алушы мен Сатушының өзара сату-сатып алу мәмілесін жасасып және орындау үшін, Тауарды жеткізумен байланысты;
6.1.2.   Сатып алушының Тауарды Қарыз және/немесе Несиелік лимит қаражатының есебінен сатып алу үшін Банкіге өтінім беруімен, толтыруымен байланысты;
6.1.3.   Статистикалық немесе өзге маркетингілік және зерттеу мақсатында;
6.1.4.   Сатып алушының Интернет-дүкеннен Тауарларды сатып алуы кезінде, сонымен бірге Сатып алушы ресімдеген Тапсырысты өңдеу үшін, Банкінің Тауарды сатып алуға арнап Қарызды/Несиелік лимитті беру мәселесін қарастыру, ресімдеу үшін, аталған тұлғалардың арасында Тауарды сатып алуға, Қарыз/Несиелік лимитті алуға, Тауардың ақысын/ақшаны төлеуге/ қайтаруға, Сатып алушының Тауарлар және/немесе Сатушылар туралы пікірлерді орналастыру үшін, Сатып алушыны сәйкестендіру және басқа мақсаттарға байланысты туындап отырған/туындаған шарттарды, құқықтар мен міндеттемелерді орындау үшін коммуникация жасау үшін Сатып алушы мен Сауда-саттық платформасының арасындағы өзара іс-қимылды қамтамасыз етумен байланысты;
6.1.5.   Сауда-саттық платформасының қолданыстағы заңнамамен тікелей көзделген талаптарды орындауымен байланысты.
6.2.   Сатып алушының оның дербес деректерін жинауға, сақтауға, өңдеуге, қолдануға және таратуға, сонымен бірге трансшекаралық таратуға келісім беруі Сатып алушының тауарды сату-сатып алу мәмілесінің күшін сақтау мерзімін қамтыған жиынтық кезеңнен кем болмайтын мерзімге арнап және сату-сатып алу мәмілелерін жасасу мен олардың орындалуын растайтын құжаттар мен ақпаратты және оларға ілеспе құжаттар мен ақпаратты сақтауға арнап Қазақстан Республикасының заңнамасымен белгіленген мерзімге арнап ұсынылған деп саналады. Сатып алушының оның дербес деректерін жинауға, сақтауға, өңдеуге, қолдануға және таратуға қатысты берген келісімінің күшін жоюы тиісті Тапсырысты орындаудан біржақты тәртіппен бас тарту туралы хабарлама деп саналатын болады және оны орындаудың мүмкін еместігін тудырады.
6.3.   Егер Тауардың түпкілікті алушысы Сатып алушыдан өзге тұлға болып отырса, Сатып алушы Тауардың түпкілікті алушысының Сауда-саттық платформасымен Тауардың түпкілікті алушысының дербес және Биометриялық деректерін сақтауға, өңдеуге, қолдануға, таратуға, сонымен бірге Сайт модульдерінің арасында трансшекаралық таратуға, сондай-ақ Сатушыға және/немесе Банкіге ұсынуға келісімін алуға міндетті болып және сол үшін жауапты болады.
6.4.   Сауда-саттық платформасы Шарттың осы бөлімінде көрсетілген мақсаттарға арнап Сатып алушылардың және Тауардың түпкілікті алушыларының келесі санаттағы дербес деректерін жинауға, сақтауға, өңдеуге, қолдануға және таратуға, сонымен бірге трансшекаралық таратуға құқылы: тегі, есімі, әкесінің есімі, Биометриялық деректер, телефон нөмірі, электронды пошта мекенжайы, жынысы, жасы, жеке басын куәландыратын құжаттың деректері, төлемдік құралдардың деректері, сатып алынатын тауарлардың атауы мен саны, тұрғылықты қаласы және/немесе тұрғылықты мекенжайы, Тауарлардың жеткізілетін мекенжайы, геолокация, Тауардың ақысының төлену қалпы, Банкілік қарыз шартының/ Жеке тұлғаға банкілік қызмет көрсету жөніндегі кешенді шарттың деректері, сонымен бірге Қарыздың/Несиелік лимиттің сомасы мен мерзімі.
6.5.   Сауда-саттық платформасы дербес деректердің субъектілері ұсынған Сайт арқылы алынған мәліметтердің өзектілігі мен шүбәсіздігін тексермейді және, әдетте, оның оларды тексеруге мүмкіндігі жоқ. Сауда-саттық платформасы дербес деректердің субъектілері қисынды және адал түрде әрекет етумен, шүбәсіз және жеткілікті мөлшердегі дербес деректерді ұсынып отыр және оларды өзекті қалпында ұстайды деген пікірге сүйенеді.
7.   Зияткерлік меншік құқығы
7.1.   Сайттағы кез келген нысандар, сонымен бірге дизайн элементтері, графикалық бейнелер, суреттер, дерекқорлар және басқа да нысандар (бұдан әрі – Сайттың мазмұны), сондай-ақ Сайтта жайғастырылған кез келген контент Сауда-саттық платформасының немесе басқа құқық иеленушілерінің айрықша құқықтарының нысандары болып табылады.
7.2.   Сайттын мазмұнын, сондай-ақ Сайттың қандай да бір басқа элементтерін Сайт ұсынған функционал шеңберінде ғана қолдануға болады. Сайттың ешқандай элементтерін құқық иеленушісінің алдын ала рұқсатынсыз пайдалануға болмайды.
7.3.   Сайттағы кез келген материалдарды немесе ақпаратты қолмен және/немесе автоматты түрде (автоматтандырылған бағдарламаларды қолданумен) қолдануға, таратуға, көшіруге және/немесе шығарып алуға болмайды. Сайттағы ақпаратты осындай кез келген түрде пайдалану, тарату, көшіру заңға қайшы болып табылады және Сауда платформасы мұндай заңға қайшы әрекеттерге қарсы іс-қимыл қабылдауға құқылы.
7.4.   Сатып алушы Сайтқа қандай да бір пікірлерді қосып енгізу/жүктеу кезінде Сатып алушының орналастырып отырған пікірінің мазмұнының қолданыстағы заңнама талаптарына сай болуы үшін толық және дербес жауапкершілікте болады, сонымен бірге пікірлердің мазмұны үшінші тұлғалардың құқығы мен заңды мүддесін, сонымен қатар авторлардың жеке мүліктік емес құқықтарын, үшінші тұлғалардың өзге зияткерлік құқықтарын бұзатын жағдайларда және/немесе оларға тиесілі материалдық емес игіліктерге қол сұғылған жағдайда сол үшін үшінші тұлғалардың алдында жауапкершілікте болады.
Сатып алушының Сайтты қолданған кезде заңсыз, үшінші тұлғаларға жала жабатын, олардың ар-намысына тиетін, әлеуметтік, ұлтаралық, нәсіларалық алауыздықты тудыратын, зияткерлік меншік құқығын бұзатын пікірлерді қалдыруға құқы жоқ.
7.5.   Сатып алушы Сайтта пікір қалдырумен байланысты тәуекелдердің барлығын өз бетінше бағалап отыруы тиіс екенін, сондай-ақ ол Сауда-саттық платформасына Сатып алушының Сайтта қалдырған пікірлеріне байланысты қандай да бір шағымдар берілген жағдайда Сауда-саттық платформасының барлық залалдарын өтеуге міндетті болатынын растайды және мұнымен келіседі.
7.6.   Сатып алушы Сауда-саттық платформасына Сайттың қызметін қамтамасыз ету, Сауда-саттық платформасының заңды құқықтары мен мүдделерін жүзеге асыру, сонымен бірге тиісті нысандарды құқықтық қорғауды қамтамасыз ету мақсатында, сондай-ақ маркетингілік мақсатта Сатып алушымен жүктемеленіп отырған пікірлерді кез келген әдіспен барлық жерде күшінде болатын мерзімсіз және тегін пайдаланып отыру құқығын ұсынады. Сатып алушының Сауда-саттық платформасына осы тармаққа сәйкес ұсынған пікірлерді пайдалану құқығы Сатып алушылардан пікірлер түрінде алынған ақпаратты бақылап отыру және Сауда-саттық платформасының олардың (пікірлердің) кез келгенін Сайтта жариялау туралы шешім қабылдау құқығын қамтиды.
8.   Өзге шарттар
8.1.   Осы Шарттың тараптары Қазақстан Республикасының қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл саласындағы заңнама талаптарын ұстанып отыруға, қылмыстық жолмен алынған кірістерді заңдастырумен, терроризмді қаржыландырумен байланысты туындап отыратын тәуекелдерді тиісті түрде басқаруға және жоғарыда аталған міндеттердің жүзеге асырылуына мерзімді мониторинг жүргізіп отыруға міндетті. Шарттың Тарабы Сайтты қолданған кезде, сондай-ақ Сайтты қолданумен, Тапсырыс берумен/орындаумен, Тауарды сату-сатып алу мәмілелерін орындаумен байланысты кез келген іс-қимылдарды жүзеге асырған кезде заңсыз қаржылық қызметке, ақшалай қаражаттарды заңдастыруға және терроризмді қаржыландыруға және әкімшілік және/немесе қылмыстық тұрғыдан жазалануы мүмкін, соттық тергеудің тақырыбы болып және/немесе Сауда-саттық платформасы және/немесе Банк үшін іскерлік беделінен айырылу қаупін тудыруы мүмкін басқа кез келген заңсыз операцияларға тікелей немесе жанама дем берушілік жасамауға міндетті. Сатушылар Сауда-саттық платформасына оның сұратуы бойынша өзінің қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл шараларын жүзеге асыру жөніндегі міндеттерін растау үшін қажетті кез келген ақпаратты ұсынып отыруға міндетті. Осы тармақта көрсетілген талаптарды орындамау Сауда-саттық платформасының мұндай Сатушымен ынтымақтастық қатынастарын тоқтатуына әкеп соқтыруы мүмкін.
8.2.   Сатып алушы өзінің есептік жазбаға қатынау үшін таңдап алған құралдарының қауіпсіздігі (ойлап табуға қарсы төзімділігі) үшін өзі жауапты болады, сондай-ақ есептік жазбаға қатынау құралдарының, PIN кодтарының, төлемдік (несиелік) карта нөмірлерінің, құпиясөздердің, төлқұжаттық және өзге деректердің құпиялылығын өз күшімен қамтамасыз етеді. Сатып алушы Сайттың шеңберінде немесе оның функционалын және Сауда-саттық платформасының сервистерін Сатып алушының есептік жазбасымен қолданумен жүзеге асырылған барлық іс-қимылдар үшін (сондай-ақ олардың салдары үшін) өзі жауапты болады. Сатып алушы Сатып алушының есептік жазбасына қатынауға арналған деректерді үшінші тұлғаларға кез келген шарттармен (сонымен бірге шарттар немесе келісімдер бойынша) ұсынбауға міндетті. Бұл жағдайда Сайттың шеңберінде немесе оның функционалын және/немесе Сауда-саттық платформасының сервистерін Сатып алушының есептік жазбасымен қолданумен жүзеге асырылған іс-қимылдардың барлығы Сатып алушының өзімен жасалған деп саналады.
8.3.   Сатып алушы Сауда-саттық платформасына Сайтқа Сатып алушының есептік жазбасын қолданумен кез келген рұқсат етілмеген түрде (Сатып алушымен рұқсат етілмеген) қатынау жағдайы туралы және/немесе өзінің есептік жазбаға қатынау құралдары құпиялылығының кез келген бұзылуы (бұзылған деген күдігі туралы) дереу түрде хабарлап отыруға міндетті. Сатып алушы қауіпсіздік мақсатында Сайтпен әрбір жұмыс сессиясын аяқтаған кезде өзінің есептік жазбасы бойынша жұмысын қауіпсіз түрде аяқтап отыруға міндетті. Сауда-саттық платформасы Сатып алушының Шарттың 8.2, 8.3 тармақтарын бұзуының салдарынан орын алуы мүмкін кез келген сипаттағы зардаптар үшін жауапкершілікте болмайды.
8.4.   Шарттың Тараптары Сауда-саттық платформасының Шарттың Тараптарына (Сатып алушыларға, сондай-ақ Сатушыларға) ақпараттық және жарнамалық хабарламаларды, сонымен бірге Сайт аспаптарын, SMS-хабарламаларды, электронды хабарламаларды, өзге байланыс түрлерін қолданумен жіберуге құқылы болатынымен келісетіндігін растайды. Шарттың Тараптарына аталған ақпаратты ұсыну олардың Сайттың сервистерін пайдалануы үшін қажет. Егер Сатып алушы немесе Сатушы осы тармақшаның шарттарымен келіспей отырған болса, оның Сауда-саттық платформасының сервистерін пайдаланбағаны жөн.
8.5.   Сауда-саттық платформасы өзінің ұйғарымы бойынша, сонымен бірге Сатып алушы осы Шартты немесе Қазақстан Республикасының қолданыстағы заңнамасын бұзған жағдайда Сатып алушының есептік жазбасын бұғаттап немесе өшіруге, сондай-ақ Сатып алушының Сайтқа және оның функционалына қатынауына тыйым салуға құқылы.
8.6.   Сатып алушының Сайттағы өзінің есептік жазбасын өшіргеніне байланыссыз Сатып алушының Сауда-саттық платформасына қатысты барлық міндеттемелері, сонымен бірге күші бар Тапсырыстар, сондай-ақ Сауда-саттық платформасының сервистері мен қызметтеріне қатысты болып келетін, Сайттын функционалы арқылы жүзеге асырылған өзге кез келген сұратулар, егер Сауда-саттық платформасы Сатып алушыны мұндай міндеттерден босатпаған болса, Сатып алушының оларды толығымен орындаған сәтіне дейін күшінде қалады.
8.7.   Егер Сатып алушы Тапсырыстардың күшін бірнеше мәрте жойып отырған болса, сапасы дұрыс Тауарды қабылдаудан бас тартып немесе осы Шартты немесе Сайтта жарияланған өзге ережелерді бұзып отырған болса, Сауда-саттық платформасы мұндай Сатып алушыға арнап Сайттың функционалын пайдалану шарттарын біржақты тәртіппен өзгертуге құқылы болады.
8.8.   Шарт Сатып алушы мен Сатушы үшін Тараптың осы Шарттың 2.2 және 2.3 тармақтарымен көзделген тәртіппен қосылған сәтінен бастап күшіне енеді.
8.9.   Сауда-саттық платформасы осы Шартқа өзінің ұйғарымы бойынша (біржақты тәртіппен) кез келген уақытта өзгертулер және/немесе толықтырулар енгізіп отыруға құқылы. Өзгертілген/толықтырылған Шарттың мәтінін Сауда-саттық платформасы Сайтта жариялайды және ол осындай жарияланған сәттен бастап күшіне енеді.
8.10.   Егер сол не өзге себептермен осы Шарттың бір немесе бірнеше ережесі жарамсыз немесе заңды күші жоқ деп танылған болса, бұл Шарттың қалған ережелерінің жарамдылығына немесе күшіне әсерін тигізбейді.
8.11.   Осы Шарт бойынша кез келген дауларды және/немесе келіспеушіліктерді Тараптар келіссөздер арқылы шешіп отырады. Келіссөздерді жүргізу мүмкін болмаған жағдайда немесе дауларды, келіспеушіліктерді және кереғарлықтарды келіссөз арқылы шешу мүмкін болмаған жағдайда олар Қазақстан Республикасының заңнамасымен белгіленген сот тәртібімен, Сауда-саттық платформасының орналасқан жеріндегі сотта шешіледі.
8.12.   Осы Шарт Қазақстан Республикасының заңнамасына сәйкес реттеліп және пайымдалады.